„Við erum í þessum töluðum orðum að fara yfir íslensku landhelgislínuna,“ segir Ægir Birgisson, skipstjóri á Ásgrími Halldórssyni SF-250, í samtali við 200 mílur. Skipið hefur verið á makrílveiðum á miðunum í Smugunni og var veiðin mjög góð seinnipartinn í gær að sögn Ægis og er skipið á landleið með 870 tonn af makríl.

„Þegar við komum var veiðin að dragast upp og við fórum austar í Smuguna. Það var hálfleiðinlegt veður í fyrradag en svo lægði í gærmorgun og gerði mjög góða veiði seinnipartinn sem hélt áfram í nótt,“ segir hann.

„Þetta er stór og fallegur makríll. Það er mikil ferð á honum ennþá og við vorum að elta hann á fleygiferð norðureftir,“ útskýrir Ægir og bætir við að makríllinn hafi gengið hratt norður í ætisleit. „Það var kominn rússneskur floti norðar en við vorum. Mér sýndist í morgun að þeir væru komnir alveg að línunni við Jan Mayen-lögsöguna. Þeir þurfa sjálfsagt að fara að finna einhverja aðra göngu þegar þeir missa þetta yfir það sem við vorum að veiða í,“ segir hann.

Gert er ráð fyrir að Ásgrímur Halldórsson, sem Skinney-Þinganes gerir út, leggi við bryggju í Höfn í Hornafirði í hádeginu á morgun.

Uppsjávarskipið Ásgrímur Halldórsson SF frá Hornafirði. Ljósmynd/Börkur Kjartansson

Tengdar fréttir

Makrílveiðar

Útbreiðsla makríls í íslenskri landhelgi ein sú minnsta

• „Veiðiárangur er oft spurning um heppni“
• „Þetta gengur mjög rólega og lítið um makríl“
• Fyrsti makríllinn úr íslenskri lögsögu
• Tæplega fimm kíló af makríl fyrir eitt af þorski

» Fleiri tengdar fréttir

• Blogga um frétt