Verð fyrir afurðir í hæstu hæðum

Verð fyrir margar tegundir sjávarafurða er nú í hæstu hæðum að sögn Gunnars Tómassonar, framkvæmdastjóra Þorbjarnarins í Grindavík. Eftir verðlækkanir stóran hluta þess tíma sem kórónuveirufaraldurinn geisaði í heiminum tók verð að hækka síðasta haust. Flestar tegundir hafa hækkað í verði og verð fyrir sjófryst þorskflök er nú meira en 20% hærra en það var áður en faraldurinn skall á og hefur aldrei verið hærra, að sögn Gunnars. Á móti kemur að gengi krónunnar hefur aðeins styrkst.

Afurðirnar fara víða um heim

Þorbjörninn gerir út tvo flakafrystitogara, tvö línuskip og einn lítinn ísfisktogara. Frystitogararnir Tómas Þorvaldsson og Hrafn Sveinbjarnarson hafa síðustu vikur slegið hvert metið af öðru hvað varðar verðmæti í veiðiferð. Í gær var verið að landa úr Hrafni Sveinbjarnarsyni í Grindavík og var áætlað að verðmætið væri vel yfir 500 milljónir, sem er það mesta í sögu útgerðarinnar. Í byrjun apríl var afla landað úr skipinu að verðmæti 432 milljónir þannig að verðmæti úr þessum tveimur veiðiferðum gæti verið nálægt 950 milljónum.