Létu smíða 40 metra veiðieftirlitsbát

Smíði nýs eftirlitsbáts norsku fiskistofunnar, Fiskeridirektoratet, lauk um miðjan maí og hófust nýverið prófanir á tvíbytnunni MS Fjorgyn. Báturinn er meðal annars búinn loft- og neðansjávardrónum. Hann mun meðal annars sinna veiðieftirliti meðfram strandlengju Noregs.

Báturinn verður notaður í eftirlitsverkefni og mun einnig nýtast sem aðgerðamiðstöð fyrir ýmis rannsóknarverkefni, sem og verkefni sem tengjast hreinsun hafsbotnsins. Hann verður mikilvæg viðbót við þann flota sem við höfum nú þegar yfir að ráða og gerir okkur kleift að sinna aðgerðum á mun stærra svæði,“ segir Rolf-Harald Jensen, forstöðumaður siglingasviðs Fiskeridirektoratet, í tilkynningu á vef stofnunarinnar.

Skipasmíðastöðin OMA Båtbyggeri í Stord í Noregi smíðaði tvíbytnuna úr áli og er mesta lengd 41 metri og breiddin 10,6 metrar. Fjorgyn er búinn nútímalegum búnaði, svo sem loft- og neðansjávardrónum, innrauðum myndavélum til skilvirkrar leitar og um borð er vel búin rannsóknarstofa, sem nýtist bæði af stofnuninni og samstarfsaðilum hennar.

32 hnútar

Fram kemur á vef skipasmíðastöðvarinnar að báturinn er sérhannaður vinnubátur með tengiltvinnframdrifskerfi sem dregur úr umhverfisáhrifum. Báturinn er búið fjórum hefðbundnum vélum, sem hver um sig eru 1.200 hö og hámarkshraði er 32 hnútar. Þá eru vélarnar með útblásturshreinsun sem uppfyllir ýtrustu kröfur um útblástur. Fjorgyn er einnig búið tveimur rafmótorum. Þannig er hægt að aka bátnum með raforku frá rafgeymum um borð eða sambland af dísil- og raforku. Ennfremur hafa verið settar sólarplötur á bátinn sem munu stuðla að lýsingu og hita um borð.

Líklega er um að ræða einn tæknivæddasta fiskveiðieftirlitsbát sem sést hefur. Ljósmynd/Oma Båtbyggeri

„Báturinn hefur ekki verið formlega afhentur ennþá. Enn sem komið er höfum við aðeins fengið tilkynningar um smávægileg atriði sem þarf að lagfæra. Þetta lofar góðu. Fyrir norsku fiskistofuna mun þessi bátur þýða traust skref fram á við og gefa okkur enn betra tækifæri til að sinna verkefnum okkar,“ segir Jensen.

Þrátt fyrir að tvíbytnan sé smíðuð með verkefni Fiskeridirektoratet fyrir sjónum er norska stofnunin ekki eigandi hennar, heldur skipsrekstrarfélagið Norled. Fjorgyn er leigður af stofnuninni til átta ára með möguleika á að framlengja leigutímann um allt að tvö ár.

Sex í áhöfn

Í Noregir eru gerðar sérstakar kröfur um mönnun báta af þessari stærð og þurfa að vera að lágmarki fjórir í áhöfn hverju sinni; skipstjóri, vélstjóri og tveir skoðunarmenn. Skipstjóri og vélstjóri verða starfsmenn Norled en eftirlitsmenn starfsmenn Fiskeridirektoratet. Í áætlunum norsku fiskistofunnar er hins vegar gert ráð fyrir því að það verði tveir eftirlitsmenn til viðbótar lágmarksmönnun og því sex í áhöfn. „Til að byrja með getur þetta þýtt að við höfum minna fjármagn á öðrum sviðum, sem siglingasvið á að sinna. En á hinn bóginn getur þessi bátur gert eftirlit með fiskveiðum á miðunum skilvirkara,“ útskýrir Jensen.