„Helvítis lægðabuna“

Ísfisktogarinn Gullver NS landaði 96 tonnum af blönduðum afla á Seyðisfirði í gærmorgun. Mest var af þorski og ýsu, að því er fram kemur í færslu á vef Síldarvinnslunnar.

„Við byrjuðum á Tangaflakinu, síðan var farið í Reyðarfjarðardýpið og á Gerpisflakið og eftir það veitt Utanfótar. Tveir dagar fóru síðan í að leita að ufsa og karfa og þá var haldið í Berufjarðarál, Lónsdýpið og á Papagrunn. Ufsa- og karfaleitin bar harla lítinn árangur. Að þessari leit lokinni var tekið eitt hol á Breiðdalsgrunni og síðan endað á Tangaflakinu. Það var semsagt víða farið,“ segir Steinþór Hálfdanarson, skipstjóri á Gullver, um túrinn í færslunni.

„Allan túrinn var sjólagið hreint út sagt skelfilegt. Það var alltaf sama áttin, helvítis lægðabuna. Þetta var eins og að vera í grautarpotti. Það er gott að koma í land eftir að hafa upplifað svona sjólag dögum saman,“ segir Steinþór.

• Blogga um frétt