Olíuflekkir reyndust loðnutorfur
Flekkir umhverfis Reykjanesskagann, sem úr lofti sýndust í fyrstu vera olíumengun í hafinu, reyndust vera loðnutorfur, að minnsta kosti að því er talið er. Um þetta skrifar Landhelgisgæslan á Facebook-síðu sína en það var áhöfn gæsluþyrlunnar TF-GNA sem kannaði flekkina og sá hvers kyns var.
Segir þar enn fremur af fjórum færeyskum loðnuskipum sem voru á ferð við skagann en auk þeirra varð áhöfn þyrlunnar vör fjölda uppsjávarveiðiskipa er flogið var yfir Garðskaga, fyrir Reykjanes og austur að Surtsey.
„Í leiðinni var ákveðið að taka hífingar við Þrídranga og var sigmanni slakað niður og hann kannaði í leiðinni hvort allt væri ekki eins og það ætti að vera í vitahúsinu, sem það var. Að því búnu var sigmaðurinn hífður upp aftur, haldið til Heimaeyjar þar sem eldsneyti var sett á vélina og flogið til Reykjavíkur,“ segir í færslu Gæslunnar.
