Gæti átt yfir höfði sér háa fjársekt

Skipstjóri norska fiskveiðiskipsins, sem staðið var að veiðum innan bannsvæðis í fiskveiðilögsögu Íslands í fyrrinótt, gæti átt yfir höfði sér háa fjársekt. Landhelgisgæslan lítur málið mjög alvarlegum augum en það er nú til rannsóknar.

Frétt af mbl.is

Vísuðu norsku skipi á bannsvæði til hafnar

„Svona mál enda yfirleitt með sektum. Þá er það skipstjórinn sem er sektaður. Það fer sinn vanagang í dómskerfinu. Þetta eru sektir sem geta hlaupið á hundruðum þúsunda eða milljónum í alvarlegustu tilfellunum,“ segir Ásgeir Erlendsson, upplýsingafulltrúi landhelgisgæslunnar.

Ekki algengt

Hann segir að fjareftirlitskerfi sem efld hafa verið til muna á síðustu árum hafi gert gæslunni kleift að fylgjast með skipinu. 

„Það er alvarlegt ef skip eru á veiðum innan þessara bannsvæða. Þau eru ekki skilgreind sem bannsvæði nema rík ástæða sé til. Það er mikilvægt að við getum fylgst vel með því sem er í gangi innan efnahagslögsögunnar,“ segir Ásgeir. 

Liðsmenn séraðgerðasveitar Landhelgisgæslunnar, lögreglumenn og fulltrúar Fiskistofu fóru um borð í skipið í gærmorgun. 

„Það er ekki algengt að þetta gerist en kemur þó fyrir. Þannig að við lítum þetta alvarlegum augum,“ segir Ásgeir. 

• Blogga um frétt