Aldrei jafn miklu úthlutað úr Fiskeldissjóð
Stjórn Fiskeldisjóðs hefur úthlutað styrkjum til tólf verkefna í sjö sveitarfélögum, samtals að fjárhæð 247,7 milljónir króna, að því er fram kmeur í tilkynningu á vef stjórnarráðsins. Aldrei hefur verið úthlutað eins miklu fé úr sjóðnum.
Alls bárust 25 umsóknir frá átta sveitarfélögum, ein var dregin til baka þannig að fyrir lágu 24 gildar umsóknir að fjárhæð 758,5 milljónir króna eða þrefalt hærri fjárhæð en var til úthlutunar.
„Stjórn Fiskeldissjóðs metur það svo að verkefnin sem hljóta styrk að þessu sinni falli öll vel að áherslum sjóðsins og séu til þess fallin að styrkja innviði sveitarfélaga og atvinnulíf á þeim svæðum þar sem fiskeldi í sjókvíum er stundað,“ segir í tilkynningunni.
Sjóðurinn er fjármagnaður með gjöldum á sjókvíaeldi og er honum ætlað að veita sveitarfélögum styrki til uppbyggingar innviða, þar sem fiskeldi í sjókvíum er stundað, og styrkja þar með samfélög og stoðir atvinnulífs á þeim svæðum.
