„Margir nánast komnir á heljarþröm“

Langir biðlistar eru á hjúkrunarheimili og segir Aríel Pétursson, formaður Sjómannadagsráðs, brýnt að höggva á þann hnút sem hefur myndast í umönnunarmálum aldraðra, að þvi er fram kemur í viðtali við Aríel í sjómannadagsblaði 200 mílna.

Sjómannadagsráð starfrækir samtals átta Hrafnistuheimili og rekur leiguíbúðafélag fyrir aldraða.

„Margir eru nánast komnir á heljarþröm vergna biðarinnar eftir plássi á hjúkrunarheimili og myndum við vilja geta brugðist við þörfinni með skjótvirkari hætti. Félagið á lóðir og búið að ganga frá skipulagsmálum og gætum við hafist handa strax í dag við að hanna nýtt húsnæði og undirbúa framkvæmdir ef hægt væri að semja við hið opinbera um leigu og rekstur,“ segir Aríel.

Viðtalið má lesa í sjómannadagsblaði 200 mílna sem fylgir Morgunblaðinu í dag.