LS vill hækka aflaviðmið um 4.000 tonn

Nýjustu tölur um afla strandveiðibáta benda til að ef aflaviðmiðun verður ekki aukin verða strandveiðar stöðvaðar nokkru fyrr en á síðasta ári. Þetta kemur fram á heimasíðu Landsambands smábátaeigenda.

Fimmtudaginn 22. júní fundaði LS með Svandísi Svavarsdóttur, matvælaráðherra, og óskuðu forsvarsmenn LS eftir að ráðherra kæmi í veg fyrir ótímabæra stöðvun strandveiða. Út frá laganna bókstaf verður það vart gert með öðrum hætti en að ráðherra hækki aflaviðmiðun. Ráðherra óskaði eftir formlegu erindi frá LS um málefnið sem nú er til skoðunar í matvælaráðuneytinu, kemur fram á heimasíðunni.

Vilja hækka aflaviðmið um 4.000 tonn

Þá var þorskafli dagana 24. til 26. júní alls 1.015 tonn en að lokinni löndun 26. júní losar þorskafli strandveiðibáta 7.566 tonn.

„Miðað við þorskafla sl. tíu daga gæti útgefinni aflaviðmiðun – 10.000 tonnum – verið náð í strandveiðivikunni 10. – 13. júlí. Verði ekki bætt við veiðiheimildum fyrir þann tíma muni Fiskistofa stöðva strandveiðar. Hér með er þess farið á leit við yður að þér komið í veg fyrir stöðvun veiðanna með því að hækka aflaviðmið um 4.000 tonn og tryggja með því jafnræði milli landshluta,“ segir í erindi sambandsins til ráðherrans. 

• Blogga um frétt