„Framleiðsla og útflutningur á eldisafurðum hefur farið afar vel af stað í byrjun árs,“ segir í nýjustu færslu Radarsins, mælaborði sjávarútvegsins. Er þar vakin athygli á því að á fyrstu tveimur mánuðum ársins hafi útflutningsverðmæti eldisafurða náð 13,3 milljörðum króna sem er mesta upphæð á þessu tímabili í sögu fiskeldis á Íslandi.

„Útflutningsverðmæti eldisafurða í janúar og febrúar er þannig er 35% hærri en frá fyrra ári í krónum talið og rúmlega 39% á föstu gengi. Nýliðinn febrúarmánuður er þriðji stærsti útflutningsmánuðurinn frá upphafi og janúar er sá fjórði. Því er óhætt að segja að eldisárið byrji með látum,“ segir í færslunni.

Mynd/Radarinn

Ekki nóg með útflutningsverðmæti eldisafurða hafi vaxið gríðarlega hefur hlutfall þessa afurða af vöruútflutnings Íslendinga í heild aukist.

„Vægi eldisafurða í vöruútflutningi var þannig 8,4% í janúar og febrúar. Síðustu ár hefur vægi þeirra verið í kringum 6% á fyrstu tveimur mánuðum ársins og var 6,4% á síðasta ári. Þetta má lesa úr bráðabirgðatölum Hagstofunnar um vöruviðskipti sem birtar voru í síðustu viku. Þar eru ekki birt útflutningsverðmæti eða magn niður á einstaka tegundir, en þær tölur verða birtar í lok þessa mánaðar. Gera má fastlega ráð fyrir að yfir 90% þessara 13,3 milljarða megi rekja til útflutnings á laxi, en hlutfall lax var um 92% í janúar.“

Jákvæð tíðindi í kjölfar samdráttar

Er aukinn útflutningur í byrjun árs sagðar „afar jákvæðar fréttir“ og er vísað til samdráttar í framleiðslu eldisafurða á síðasta ári.

„Rekja má þann samdrátt að mestu leyti til veirusmits og viðbragða vegna þess á Austfjörðum í lok árs 2021. Fiskur sem annars hefði komið til framleiðslu árið 2023 var þannig fjarlægður úr kvíum en rúmlega 60% minni framleiðsla var á Austfjörðum á síðasta ári miðað við árið áður. Góður gangur var hins vegar á Vestfjörðum þar sem um 20% aukning var á framleiðslu á eldisfiski, þar sem lax leikur lykilhlutverk.“

Þá er bent á að aukning varð í framleiðslu og útflutningi á bleikju og senegalflúru milli áranna 2022 og 2023, en samdráttur var í regnbogasilungi.

Frétt af mbl.is

Framleiðsla eldisfisks dróst saman í fyrra

Tengdar fréttir

Fiskeldi

„Margt hefur nú ekki beinlínis verið til fyrirmyndar“

• Segir nýtt frumvarp gefa eldisfyrirtækjum auðlindir
• Laxey fær sex milljarða
• Fjárfestingin 115 milljarðar króna
• Bátur Arnarlax verður fyrsti sinnar tegundar

» Fleiri tengdar fréttir

• Blogga um frétt