Valgerður Sigurðardóttir er mikill matgæðingur og er iðin við að prófa sig áfram með ýmis konar rétti og ólíkar matarhefðir og venjur frá ólíkum þjóðum. Það er einn réttur sem hún og maðurinn hennar eru fræg fyrir, það er Paella með kjúklingi sem slær ávallt í gegn og matargestirnir þeirra hafa misst sig yfir.

 „Við elskum að halda matarboð og það er oft þétt setið við borðstofuborðið hjá okkur þegar við tökum okkur til og smölum okkar besta fólki saman. Þá er hláturinn og gleðin við völd og mikið borðað. Ætli við séum ekki eins og svo margir, við göngum í gegnum tímabil þar sem við erum að leika okkur með hinar og þessar matarhefðir frá ólíkum löndum. Vinsælasti rétturinn þessa dagana er súpergóð Paella með kjúklingi sem er sáraeinfalt að útbúa og allir geta gert. Við erum dassarar af Guðs náð og eigum því ekkert auðvelt með það að halda okkur við uppskriftir og oft breytist margt þegar við erum að elda. Þið sem skellið ykkur í þetta verkefni verðið því að hafa það í huga að dassa hér og þar eftir smekk,“ segir Valgerður og hlær. 

Ódýr og góður réttur sem er ekki slæmt á þessum tímum

„Við byrjuðum að grilla Paellur á síðasta ári, pönnuna fengum við í Kokku, en pönnurnar eru til í vefversluninni hjá þeim og í versluninni í þremur stærðum. Við tókum handföngin af okkar pönnu og þá smell passaði nýja pannan á kolagrillið. Þar sem við erum með kolagrill þá er gaman að leika sér með mismunandi viðarkol og reykkubba og gefa þannig matnum ólíkan keim. Við höfum verið að grilla kjúklinginn á kolagrillinu en í þetta sinn var von á yfir 20 manns í mat og því grilluðum við kjúklinginn á gasgrillinu. Kosturinn við þennan rétt er að hann er ekki bara góður heldur er hann líka ódýr sem er nú ekki slæmt í þessu verðbólguskoti sem er að rúlla yfir okkur,“ segir Valgerður.

Þennan rétt er einfalt að gera og líka hagkvæmt, þar sem hráefnið er ekki dýrt. Ljósmynd/Valgerður