Karl Bretakonungur er útskrifaður af spítala eftir þriggja nátta dvöl. Var konungurinn lagður inn vegna aðgerðar. 

Bretakonungur var lagður inn á föstudag þar sem hann fór í aðgerð vegna stækkunar á blöðruhálskirtli. Ekki er illkynja æxli að ræða. 

Katrín prinsessa af Wales, tengdadóttir Karls, útskrifaðist einnig af spítala í dag, en hafði nú legið inni í tæplega tvær vikur vegna aðgerðar í kviðarholi. 

Frétt af mbl.is

Prinsessan af Wales útskrifuð af sjúkrahúsi

Konungurinn útskrifaðist síðdegis og fylgdi Kamilla drottning honum heim af spítalanum. Veifaði hann til fjölmiðla er hann yfirgaf spítalann.

Næstu daga mun Karl hvíla sig og hefur konungshöllin aðlagað dagskrá hans samkvæmt því. Höllin hefur ekki gefið út hvar konungurinn mun hvíla sig eða hversu lengi hann mun vera frá störfum.

Karl vinkaði til fjölmiðla er hann og Kamilla drottning héldu af spítalanum. AFP/Daniel Leal