Suðurafríski hlauparinn Wayde van Niekerk viðurkennir að hann hafi haldið að ekki væri hægt að hlaupa jafn hratt og hann gerði í Ríó í vikunni án þess að nota ólögleg lyf.
Niekerk setti nýtt heimsmet í 400 metra hlaupi á Ólympíuleikunum í Ríó. Metið hafði staðið frá því fyrir aldamót, eða frá árinu 1999. Wayde van Niekerk frá Suður-Afríku hljóp á 43,03 sekúndum. Er hann þá handhafi heims- og ólympíumeta auk þess að vera bæði heims- og ólympíumeistari í greininni en Niekerk sigraði í greininni á HM í fyrra.
Met Bandaríkjamannsins Michaels Johnsons var 43,18 sekúndur og var sett á heimsmeistaramótinu í Sevilla á Spáni árið 1999.
Van Niekerk er 24 ára gamall og hafði best hlaupið á 43,48 sekúndum þar til í hlaupinu. Árangur hans kom nokkuð á óvart ekki síst vegna þess að Niekerk hljóp á 8. braut í úrslitahlaupinu. Þykir það ekki mjög heppilegt, meðal annars vegna þess að þá sér hlauparinn illa hvernig keppinautunum vegnar.
Að sjálfsögðu fóru strax af stað sögur um ólögleg lyf en van Niekerk segir að þetta sýni að það er hægt að ná frábærum árangri án þess að nota lyf. „Ég held að þetta geti geti verið öðrum íþróttamönnum sem vilja taka þátt í leikunum gott fordæmi um hvað er hægt að gera án lyfja,“ segir hlauparinn.
En viðurkennir um leið að hann hafi áður talið útilokað að hlaupa 400 metra á skemmri tíma en 44 sekúndum án þess að nota slík lyf. Lykilinn að velgengni minni er hörkuvinna og eldmóður.
Van Niekerk hefur einnig hlaupið 200 metra hlaup undir 20 sekúndum og 100 metra hlaup undir 10 sekúndum.
Hann segir að Usain Bolt hafi hvatt hann til dáða en hann hafi fengið ráð frá Jamaíkamanninum fyrr á árinu. Bolt hafi sagt honum að grípa þau tækifæri sem bjóðist. „Það er þess vegna sem ég reyni að leggja mig allan fram því ég vil ekki láta tækifærin renna mér úr greipum á meðan ég er í því formi sem ég er í núna.“
Þjálfari van Niekerks er Tannie Ans, 74 ára gömul amma sem þjálfar marga afreksíþróttamenn. Hann segir að ómögulegt sé að segja til um það fyrirfram hvað Ans lætur hann gera. „Jafnvel ég get ekki útskýrt æfingarnar sem hún leggur fyrir mig.“