Sayfullo Saipov, sem drap átta manns og særði 12 í hryðjuverkaárás í New York á þriðjudag, hefur sagt rannsakendum að hann hafi byrjað að skipuleggja árásina fyrir ári.
Saipov sagði að hann hefði ætlað sér að drepa eins marga og mögulegt væri og að hann „væri ánægður“ með árásina.
Hann hefur verið ákærður fyrir hryðjuverkið en Donald Trump Bandaríkjaforseti hefur krafist dauðarefsingar. Dauðarefsing er ekki heimiluð í New York-ríki þar sem Saipov framdi ódæðið.
Saipov kom fyrir dómara í hjólastól sólarhring eftir ódæðið á hjóla- og göngustíg á Lower Manhattan. Samkvæmt skjölum sem lögð hafa verið fram vegna málsins prófaði Saipov að leigja bíl fyrir mánuði og keyra sömu leið og hann gerði þegar hann framdi hryðjuverkið. Gerði hann það til að æfa sig.
Hann ákvað að fremja ódæðið á hrekkjavöku vegna þess að hann vissi að þá yrði fleiri á ferli. Upphaflega ætlaði hann einnig að ráðast að fólki á Brooklyn-brúnni. Saipov hugðist hafa fána Ríkis íslams á bílnum en hætti við vegna þess að hann taldi að það myndi draga of mikla athygli að honum.
90 ofbeldisfull myndskeið fundust á síma hans, tengd Ríki íslams, en þau „veittu Saipov innblástur“.
Samkvæmt BBC sagði John Miller, aðstoðarlögreglustjóri í New York, að svo virtist sem Saipov hefði fylgt nánast í öllu leiðbeiningum Ríkis íslams sem vígasamtökin hafa birt á samfélagsmiðlum. Hvernig eigi að fremja slíkar árásir o.fl.