Forseti Bandaríkjanna, Donald Trump, sendi framkvæmdastjóra bandarísku leyniþjónustunnar (CIA), Mike Pompeo, til Norður-Kóreu á fund leiðtoga landsins, Kim Jong-un, nýverið. Tilgangur ferðarinnar var að undirbúa jarðveginn fyrir leiðtogafund Kim og Trump í maí.
Þetta herma tveir heimildarmenn New York Times sem fengu upplýsingar um leyniferðina. Greint var frá þessu í gær. Trump ýjaði að því síðdegis í gær að fundurinn hafi verið haldinn þegar hann greindi frá því að Bandaríkin ættu í beinum viðræðum við Norður-Kóreu og þær viðræður væru á afar háttsettu stigi og að Hvíta húsið væri að skoða fimm staði sem mögulega staðsetningu fyrir leiðtogafundinn.
Pompeo, sem verður næsti utanríkisráðherra Bandaríkjanna, hefur verið í samskiptum við Norður-Kóreu í gegnum boðleiðir leyniþjónustu ríkjanna tveggja. Eins hefur hann verið í nánum samskiptum við leyniþjónustu Suður-Kóreu, einkum framkvæmdastjóra hennar, Suh Hoon, sem talið er að hafi komið á fundi Kim og Trump.
Frétt New York Times frá því í gær