Donald Trump, forseti Bandaríkjanna, segir talsverðar líkur á að leiðtogafundi hans og Kim Jong-un, leiðtoga Norður-Kóreu, verði frestað um óákveðinn tíma. BBC greinir frá.
Trump og og Moon Jae-in, forseti Suður-Kóreu, áttu fund í Hvíta húsinu í dag. Suður-kóreskir fjölmiðlar greina frá því að þar hafi Moon líklega sagt forsetanum við hverju hann mætti búast frá Kim í aðdraganda leiðtogafundarins. Leiðtogar Norður- og Suður-Kóreu áttu sögulegan fund í lok apríl þar sem þeir ræddu um afkjarnorkuvopnavæðingu og varanlegan frið á Kóreuskaganum.
Í síðustu viku hótuðu stjórnvöld í Norður-Kóreu að hætta við leiðtogafund Kim Jong-un og Trumps ef Bandaríkin gera kröfu um að Norður-Kórea eyði öllum sínum kjarnorkuvopnum einhliða.
Til stóð að fundurinn færi fram 12. júní næstkomandi í Singapúr. „Ef ekkert verður af fundinum verður hann kannski seinna,“ sagði Trump í samtali við fjölmiðla fyrir fund sinn með Moon í dag.