Einn látinn vegna gassprenginga

Að minnsta kosti einn er látinn og 25 eru slasaðir af völdum gassprenginga sem hafa orðið í bæjum norður af Boston í Massachusets-ríki í Bandaríkjunum síðasta sólarhringinn. BBC greinir frá. 

Lögregla á svæðinu hefur staðfest að eldur hafi komið upp í tugum húseigna af völdum gassprenginganna. Hundruð manna hafa þurft að yfirgefa heimili sín á síðastliðnum sólarhring vegna hættu og rafmagns- og gasaðgangi heimila hefur verið lokað tímabundið til þess að koma í veg fyrir frekari tilvik af þessu tagi. 

„Ég hef verið í slökkviliði í næstum 39 ár og ég hef aldrei séð neitt þessu líkt á öllum ferlinum,“ segir Michael Mansfield, yfirmaður slökkviliðsins á svæðinu.

Yfirvöld segja að um 60-80 eldsvoðar og fjöldi sprenginga hafi brotist út á heimilum og atvinnuhúsnæðum í bæjunum Lawrence, Andover og Norður-Andover. 

Mansfield segir að yfirþrýstingur í aðalgasæð gasfyrirtækisins Columbia Gas hafi orsakað eldsvoðana, en þar var unnið að endurbótum á svæðinu við gasæðar.

Íbúar eru hvattir til þess að rýma heimili sín þar til hættunni hefur verið aflýst. AFP

Forgangsverkefni að tryggja öryggi

Ríkisstjóri Massachusetts, Charlie Baker, sagði að yfirvöld væru nú fullviss um að engir frekari eldar yrðu á svæðinu af þessum orsökum. 

Móðurfyrirtæki Columbia Gas, NiSource, sagði í yfirlýsingu að hugur þeirra væri hjá þeim sem hefðu beðið skaða af eldsvoðunum. 

„Okkar forgangsverkefni er að tryggja öryggi viðskiptavina okkar og nágrennis með því að styðja við þá og framkvæma öryggisprófanir á kerfinu okkar og nærumhverfi,“ segir í yfirlýsingunni. Gastæknimenn kanna nú öll húsin á svæðinu ásamt lögreglu og slökkviliði til þess að kanna öryggi húsanna. 

Hinn látni hét Leonel Rondon og var 18 ára. Hann sat í bíl í Lawrence ásamt tveimur vinum sínum þegar skorsteinn hafnaði á bíl hans í kjölfar sprengingar í húsi skammt frá. 

Íbúar bæjanna hafa verið hvattir til þess að rýma heimili sín þar til hættunni hefur verið aflýst. 

• Blogga um frétt