Donald Trump Bandaríkjaforseti stendur með vali sínu á Brett Kavanaugh til setu í Hæstarétti en viðurkennir að útnefning hans gæti tafist vegna ásakana um kynferðislegt ofbeldi.
„Ég held að hann sé á réttri leið, hárréttri leið,“ sagði Trump í Hvíta húsinu. „Ef það verður einhver töf þá verður að hafa það.“
Spurður hvort Kavanaugh hafi boðist til þess að draga sig í hlé vegna ásakananna sagði Trump: „Þetta er fáránleg spurning.“
Christina Blasey Ford, bandarískur prófessor á sextugsaldri, steig í gær fram undir nafni og sakaði Kavanaugh um að hafa, í félagi við annan ungan mann, rekið sig inn í svefnherbergi í unglingasamkvæmi á heimili í Montgomery-sýslu. Þeir hafi báðir verið mjög ölvaðir og félaginn hafi horft á meðan Kavanaugh hafi reynt að fá sínu fram í rúmi í herberginu, þuklað á henni og misnotað.
Kavanaugh hefur vísað þessu á bug.