Líkur á að fleiri finnist á lífi í rústunum sem fellibylurinn Mikael skildi eftir sig í Flórída-ríki Bandaríkjanna eru hverfandi, að sögn bandarískra yfirvalda.
Fréttastofa Reuters greinir frá.
„Við sólarupprás hefjum við leit á ný,“ sagði Alex Baird, slökkviliðsstjóri í Panama borg í Flórída, en borgin er ein af þeim sem er hvað verst útleikin eftir Michael. „Við vonumst til að finna fleiri eftirlifandi, en það er mikið vafamál hvort það gerist.“
Búist er við að Donald Trump Bandaríkjaforseti sæki bæði Flórída og Georgíuríki heim nú í vikunni til að berja skemmdirnar augum, og samkvæmt upplýsingum frá Hvíta húsinu er forsetinn staðráðinn í að hjálpa yfirvöldum í ríkjunum í bataferlinu.
Tala látinna var komin upp á 18 í gærkvöld og búist er við að hún muni hækka nú þegar björgunarfólk fer úr húsi í hús í strandbæjum í Flórída, Georgíu og Karólínuríkjunum tveimur.