Barn notað í sjálfsvígsárás á brúðkaup

Fimm fórust hið minnsta og á fimmta tug manna særðist þegar barn var notað til að gera sjálfsvígsárás á brúðkaupsveislu í austurhluta Afganistan.

Árásin átti sér stað í morgun í Pachiragam í Nangahar héraði sem er nærri landamærum Pakistans og segir Attaullah Khugyani, talsmaður héraðsins, að barnið hafi verið notað til að gera árás á herforingja uppreisnarsveita sem styðja stjórnvöld.

BBC segir talibana hafna því að árásin sé að þeirra undirlagi. Vígasamtökin, IS Khorasan, sem tengjast Ríki íslams eru einnig virk í héraðinu og hefur verið kennt um fjölda mannskæðra árása í Afganistan m.a. sjálfsvígsárás á menntastofnun í Kabúl í fyrra sem kostaði tugi manns lífið.

Ekki eru nema nokkrir dagar síðan uppreisnarmenn talibana og fulltrúar afganskra stjórnvalda undirrituðu skuldbindingu um að reyna að takmarka mannfall almennra borgara. Féllust deiluaðilar á „vegvísi til friðar“ sem hugsaður er sem grundvöllur að formlegum friðarviðræðum í framtíðinni.

Indverska PTI fréttaveitan segir táning hafa verið notaðan í sjálfsvígsárásinni og er það ekki í fyrsta skipti sem slíkt er gert. Þannig voru t.a.m. tvær stúlkur og einn drengur notuð í árás í Borno héraðinu í Nígeríu fyrr á þessu ári og þá voru tvær stúlkur, 9 og 12 ára gamlar, notaðar í fyrra til að gera árás á kirkju í Surabaya í Indónesíu.

• Blogga um frétt