Á salerni á fjórðu hæð verslunarmiðstöðvarinnar Terminal 21 faldi hópur fólks sig klukkustundum saman fyrir fjöldamorðingja sem gekk berserksgang í miðstöðinni. Meðal annars fjölskylda sem þakkar starfsmanni sem fylgdist með ferðum morðingjans í gegnum öryggismyndavélar. Talið er að með þessum upplýsingum, sem dreift var í gegnum skilaboðasmáforrit til fólks sem var í felum í byggingunni, hafi tekist að bjarga lífi allt að 30.
Klukkutímum saman vafraði byssumaðurinn, hermaður sem hafði lent í harðvítugum deilum vegna fasteignaviðskipta, um verslunarmiðstöðina og lét reiði sína bitna á þeim sem hann rakst á. Áður hafði hann drepið fólk í herstöðinni og á leiðinni í verslunarmiðstöðina. Alls urðu fórnarlömbin 30 talsins en tugir til viðbótar eru særðir, sumir alvarlega.
Fólk faldi sig víðsvegar, meðal annars í búningsklefum. Þar á meðal er Aldrin Baliquing, sem segist hafa verið skelfingu lostinn enda verslunin sem hann var inni í skammt frá þeim stað þar sem byssumaðurinn hélt fólki í gíslingu.
„Allt gerðist svo hratt,“ sagði Lapasrada Khumpeepong, 13 ára, við fréttamann AFP við minningarathöfnina sem haldin var í dag. Hún og móðir hennar læstu sig inni á salerni á fyrstu hæð verslunarmiðstöðvarinnar. Þar voru þær í fimm klukkustundir eftir að hafa flúið undan skothríðinni. „Takk öll sem fórnuðuð lífi ykkar fyrir okkur hin,“ sagði hún við minningarathöfnina. „Án ykkar værum við ekki hér.“