Sjúkrahús í London standa frammi fyrir samfelldri flóðbylgju alvarlega veikra sjúklinga vegna kórónuveirunnar að sögn yfirmanns NHS Providers, Chris Hopson. NHS Providers annast stjórnun á öllu heilbrigðiskerfi breska ríkisins. Hopson var í viðtali við morgunþáttinn Today á BBC í morgun. 

Spurður út í ástandið í höfuðborginni sagði Hopson að það væri tvennt sem stjórnendur sjúkrahúsa þar væru að glíma við: Annars vegar gríðarlega fjölgun alvarlegra veikra sjúklinga með COVID-19 og umræðan minnti helst á þegar talað er um flóðbylgju (tsunami) eftir harða jarðskjálfta. „Við erum að sjá  30%, 40% og jafnvel 50% starfsfólks á sumum stöðum sem er að smitast af veirunni eða eru í áhættuhópi og þarf sjálft að fara í sóttkví. Við höfum aldrei áður séð slíkar fjarvistir,“ segir Hopson. 

Verið er að breyta ExCeL sýningarhöllinni í sjúkrahús og verður þar rými fyrir 4 þúsund sjúklinga. AFP

Að sögn heilbrigðisráðherra Bretlands hefur yfir hálf milljón íbúa í Bretlandi skráð sig á útkallslista í heilbrigðiskerfinu og verið er að kaupa mikið magn af öndunar- og súrefnisvélum fyrir heilbrigðisstofnanir. 

Að sögn Hopson er verið að reyna að bæta í þjónustuna. Meðal annars er verið að bæta við fjögur þúsund sjúkrarúmum í sýningarhöll í London sem verið er að breyta í færanlegt sjúkrahús en yfirmenn sjúkrahúsanna í London óttist að þau munu fyllast strax.

84 ára gamall maður var fyrsti fanginn sem deyr úr kórónuveirunni í breskum fangelsum en hann lést á sjúkrahúsi á sunnudag. Hann var með undirliggjandi sjúkdóma. Alls eru 19 fangar smitaðir af kórónuveirunni í 10 fangelsum í Bretlandi. Fjórir starfsmenn hafa einnig greinst með COVID-19.