Stjórnendur IKEA segja að gripið verði til hertra öryggisaðgerða í verslunum fyrirtækisins í Kína eftir að myndskeið sem sýnir konu fróa sér í einni verslun IKEA í Kína fór eins og eldur í sinu um netheima.
Í myndskeiðinu sést kona fróa sér hálfnakin á mismunandi sófum og rúmum í versluninni án þess að aðrir viðskiptavinir taki eftir því hvað hún var að gera að því er segir í frétt AFP-fréttastofunnar.
Búið er að fjarlægja myndskeiðið af samfélagsmiðlum í Kína þannig að ekki er vitað hversu margir horfðu á það áður en það var fjarlægt en níu milljónir hafa horft á myndskeið þar sem IKEA fjallar um málið.
Þar kemur fram að fyrirtækið fordæmi slíka hegðun og hafi strax tilkynnt þetta til lögreglu í borginni þar sem viðkomandi verslun er, án þess að fram komi um hvaða borg er að ræða.
IKEA segir að öryggisreglur verði hertar sem og þrif í verslunum fyrirtækisins í Kína og fólk hvatt til þess að skoða sig um í verslunum á siðsaman hátt.
Ekki hefur verið upplýst um hver konan er né heldur hver tók upp myndskeiðið en einhverjir notendur samfélagsmiðla í Kína telja að upptakan sé frá Guangdong-héraði vegna þess að kantónska, sem er töluð í þessum hluta Kína, heyrist í kallkerfi verslunarinnar í bakgrunninum. Eins er talið að upptakan sé frá því áður en kórónuveirufaraldurinn kom upp þar sem enginn er með andlitsgrímu auk þess sem nánast allt athafnalíf landsins lamaðist um miðjan janúar.