Mike Dewine, ríkisstjóri Ohio í Bandaríkjunum, greindist með COVID-19 í dag skömmu áður en hann átti að taka á móti Donald Trump Bandaríkjaforseta sem var í opinberri heimsókn í Cleveland í Ohio.
DeWine segist ekki vera með nein einkenni sjúkdómsins en fór í sýnatöku fyrir fundinn með Trump líkt og allir þurfa að gera áður en þeir hitta forsetann. Trump var í Cleveland til að ræða efnahagslega velsæld og að heimsækja verksmiðju raftækjaframleiðandans Whirlpool. Politico og fleiri fjölmiðlar greina frá þessu.
Governor DeWine has tested positive for #COVID19. He has no symptoms at this time. Full statement below. pic.twitter.com/WnkmoGxR2m
— Governor Mike DeWine (@GovMikeDeWine) August 6, 2020
Búið er að aflétta lokunum og hluta af takmörkunum sem settar voru á vegna kórónuveirufaraldursins í Ohio en grímuskylda er enn í gildi og hefur verið síðan 23. júlí. Fleiri en 96 þúsund staðfest smit hafa greinst í ríkinu og dauðsföll vegna COVID-19 eru orðin fleiri en 3.500 talsins samkvæmt gögnum frá Johns Hopkins háskóla.
DeWine er annar ríkisstjórinn í Bandaríkjunum sem hefur sýkst af kórónuveirunni svo vitað sé. Í síðasta mánuði var greint frá því að Kevin Stitt, ríkisstjóri Oklahoma, hefði greinst jákvæður fyrir veirunni skömmu eftir að hafa verið viðstaddur fjöldafund Trump í Tulsa án þess að bera andlitsgrímu.