Fleiri Bandaríkjamenn hafa látist af völdum Covid-19 heldur en féllu í síðari heimsstyrjöld samkvæmt talningu á vegum Johns Hopkins-háskólans. Í kvöld náði tala látinna upp í 405.400 manns en alls létust 405.399 bandarískir hermenn í seinni heimsstyrjöldinni samkvæmt tölum frá skrifstofu uppgjafahermanna Bandaríkjanna.
Tölurnar koma beint í framhaldi af innsetningarathöfn Joe Bidens sem hefur þegar undirritað 15 forsetatilskipanir, eina þess efnis að grímuskylda verði innleidd í byggingum og landareignum sem tilheyra bandaríska alríkinu. Sama tilskipun fól í sér áskorun til Bandaríkjamanna um að ganga með andlitsgrímur næstu hundrað daga til þess að stemma stigu við uppgangi kórónuveirunnar.
Fjögur prósent allra jarðarbúa tilheyra Bandaríkjunum en 20% dauðsfalla af völdum Covid-19 hafa orðið í Bandaríkjunum. Sóttvarnastofnun Bandaríkjanna gerir ráð fyrir að faraldurinn nái nýjum hápunkti þegar B.1.1.7.-afbrigðið nær að dreifa sér á næstu mánuðum.