Munu birta skjöl um morðið á J.F.K. á næsta ári

Hvíta húsið frestaði í gær birtingu trúnaðargagna tengdum morðinu á John F. Kennedy, fyrrverandi forseta Bandaríkjanna, fram í desember á næsta ári. Donald Trump opinberaði þúsundir gagna um morðið í sinni forsetatíð en undanskildi nokkur á grundvelli þjóðarhagsmuna.

Ætlunin var að birta þau skjöl sem voru undanskilin núna en Joe Biden, núverandi forseti Bandaríkjanna, tilkynnti í gær að gögnin yrðu áfram trúnaðarmál fram til 15. desember á næsta ári. 

Talsmenn Hvíta hússins segja þjóðskjalaverðina þurfa meira ráðrúm til þess að fara yfir þau skjöl sem á eftir að birta og að það ferli hafi tafist vegna heimsfaraldurs. 

Frétt af mbl.is

Bréf JFK til sænsku hjákonunnar á uppboði

Biden segir töfina auk þess „nauðsynlega til að verjast áþreifanlegri hættu sem steðjar að hervörnum, leyniþjónustu, löggæslu og starfa okkar á alþjóðavettvangi,“ og sagði það vega þyngra en réttur almennings til að sjá gögnin. 

Umdeild rannsókn

Eftir 10 mánaða rannsókn á morði John F. Kennedy var niðurstaðan sú að Lee Harvey Oswald hefði verið einn að verki við verknaðinn þegar hann skaut forsetann í bílalest í Dallas. Rannsókn þessi sætti þó nokkurri gagnrýni og nefnd á vegum þingsins komst að þeirri niðurstöðu síðar að Kennedy hefði líklega verið myrtur fyrir tilstilli einhvers konar samsæris. 

Í Bandaríkjunum er ríkisstjórninni skylt að opinbera öll skjöl tengdum morðum á hátt settra embættismanna. 

• 1 blogg um fréttina

Bloggað um fréttina

• Ómar Ragnarsson: Var morðið á Kennedy vegna slysaskots lífvarðar hans?