Úkraínskar hersveitir hafa náð aftur völdum á yfir þrjátíu yfirráðasvæðum Rússa í Karkív-héraði, í norðausturhluta Úkraínu, að sögn Volodimírs Selenskí, forseta landsins.
Selenskí sagði í fyrradag að í þessari viku bærust góðar fréttir frá Karkív-héraðinu sem Rússar náðu á sitt vald snemma í stríðinu sem staðið hefur yfir frá því í lok febrúar.
„Frá og með deginum í dag hafa úkraínskar hersveitir frelsað og náð völdum yfir þrjátíu yfirráðasvæðum í Karkív-héraði,“ sagði Selenskí og bætti við að hersveitir frá Kænugarði væru í þann mund að ná völdum á fleiri svæðum.
Greint var frá því fyrr í dag að Rússar ætluðu að senda aukinn herafla til Karkív en úkraínskar hersveitir hafa farið mikinn þar undanfarna daga.