Norður-Kórea skaut tveimur eldflaugum í Japanshaf snemma morguns fimmtudags að staðartíma. Eldflaugunum er skotið á sama tíma og Öryggisráð Sameinuðu þjóðanna kemur saman í New York í Bandaríkjunum til að ræða atvikið þegar Norður Kórea skaut flugskeyti yfir Japan á þriðjudaginn.
Norður-Kórea hefur nú skotið sex eldflaugum á minna en tveimur vikum en japanski og bandaríski herinn brugðust við eldflaugaskoti Norður-Kóreu yfir Japan á þriðjudaginn með sameiginlegum heræfingum.
Í gær skutu Suður-Kórea og Bandaríkin fjórum flugskeytum í Japanshaf til að svara fyrir sig og því ljóst að spenna er að byggjast upp á svæðinu.
„Við höfum aukið eftirlit og herinn viðheldur ýtrasta viðbúnaði í samráði við Bandaríkin,“ sagði í tilkynningu frá stjórnvöldum Suður-Kóreu.