Helgi Hjörvar, þingmaður Samfylkingarinnar, fór fram á það í dag í ræðu sinni á Alþingi að Davíð Oddsson forsætisráðherra greindi frá því úr ræðustól á Alþingi hvort hann hefði veitt umboðsmanni tiltal eður ei, að því er kom fram í fréttum RÚV.
Þá sagði Helgi í samtali við RÚV að forsætisráðherra geti ekki verið bundinn trúnaði um það sem ekki hafi farið fram í samtalinu við umboðsmann Alþingis. „Hafi hann ekki með ósæmilegum hætti veitt umboðsmanni tiltal fyrir álit hans á skipan hæstaréttardómara, þá getur hann auðvitað upplýst um það án þess að rjúfa nokkurn trúnað að það hafi ekki verið efni samtalsins. En því miður benda yfirlýsingar hans í fjölmiðlum og nú þessi fundur [sem forseti og fyrsti varaforseti þingsins áttu með umboðsmanni og forsætisráðherra] í dag mjög eindregið til þess að þar hafi hann gengið langt út fyrir verksvið sitt og ógnað starfsskilyrðum umboðsmanns Alþingis sem er grafalvarlegt mál,“ sagði Helgi.