Það er ekki oft sem of gott veður setur hlutina úr skorðum á Íslandi en mótshaldarar WOW Cyclothon-hjólreiðakeppninnar fengu óvænt að kenna á því þar sem of gott veður síðustu sólarhringa hefur gert það að verkum að hjólreiðamennirnir eru á undan áætlun.
Til stóð að endamark Cyclothonsins yrði sett upp í fyrramálið klukkan sex og var fyrirséð að fyrstu hjólreiðamennirnir kæmu í mark fljótlega upp úr því. Núna er aftur á móti útlit fyrir að Eiríkur Ingi Jóhannsson slái brautarmet einstaklinga og komi í mark um miðnætti. Þurftu mótshaldarar því að flýta uppsetningu endamarksins um hálfan sólarhring svo það yrði nú örugglega mark þegar Eiríkur kemur í mark.
Þrjú lið í tíu manna keppninni berjast nú um efstu þrjú sætin; Team Skoda, Sensa og TRI. Liðin komu langt á undan öðrum liðum til Egilsstaða, en flest liðin eru núna á milli Mývatns og Egilsstaða. Airport Direct, GÁP og Harðkjarna berjast um efstu þrjú sætin í flokki fjögurra manna liða.