Maðurinn sem fluttur var með þyrlu Landhelgisgæslunnar á Landspítalann í gærkvöldi varð fyrir vinnuslysi á bóndabæ. Þetta staðfestir Sveinn Rúnar Kristjánsson, yfirlögregluþjónn hjá lögreglunni á Suðurlandi.
Maðurinn, sem er á áttræðisaldri, er ekki lífshættulega slasaður og reyndist slysið ekki jafn alvarlegt og í fyrstu var talið, að sögn Sveins.
Maðurinn var sóttur með þyrlu Landhelgisgæslunnar sem lenti á ellefta tímanum í Reykjavík í gær.
mbl.is greindi frá því í gær að maðurinn hefði slasast á víðavangi í Rangárþingi, skammt austan við Þjórsá. Sveinn gat ekki veitt frekari upplýsingar um slysið.
Málið er til rannsóknar hjá lögreglunni á Suðurlandi.