Innlent | Kosningar | mbl | 9.9.2021 | 18:40

Píratar óttast samþjöppun auðs

Píratar óttast að kórónuveiran og kreppan sem henni fylgir valdi því að fjármunir færist á fárra hendur. Það sé reynslan erlendis frá.

Þetta kemur fram í viðtali þar sem Halldóra Mogensen, þingflokksformaður Pírata á vettvangi Dagmála í dag.

Hún segir nýfrjálshyggju hafa verið sú stefna sem rekin hafi verið hér á landi um langt skeið og að þeirri hugmyndafræði hafi fylgt sú afstaða að ekki sé hægt né heldur þörf á að uppræta fátækt. Hún sé ósammála þeirri nálgun og telji að umfangsmiklar kerfisbreytingar geti komið því til leiðar.

Hún telur að samþjöppun fjármagns muni eiga sér stað vegna kreppunnar hér á landi, jafnvel þótt opinberar tölur Hagstofu Íslands bendi til þess að kaupmáttur lægstu launa hafi aukist meira undanfarin misseri en þeirra sem hærri hafa tekjurnar.

Frétt af mbl.is

Slá má lán fyrir upptöku borgaralauna

Í viðtalinu er talsverðu púðri eytt í að varpa ljósi á hugmyndir Pírata um innleiðingu borgaralauna sem myndu þegar allt er talið kosta ríkissjóð hundruð milljarða í auknum útgjöldum á ári hverju. Flokkurinn vill hins vegar innleiða þá stefnu í skrefum, fyrst með því að hækka persónuafslátt um 25 þúsund krónur og greiða hann að fullu út til þeirra sem ekki vilja vinna. Halldóra metur kostnaðinn við þá innleiðingu á rúmlega 50 milljarða króna.

Segist hún vilja leggja allt púður samfélagsins í að uppræta fátækt. Það sé nauðsynlegt nú þegar við stöndum frammi fyrir gríðarlegum áskorunum á borð við fjórðu iðnbyltinguna þar sem störf muni tapast en einnig vegna loftslagsbreytinga.