Myndskeið: Laxinn mættur í Kjósina - Staðfest

Fyrstu vorlaxarnir er mættir í Laxá í Kjós. Síðustu daga hafa veiðimenn víða verið á vappi að reyna að koma auga á þá fyrstu. Mikið vatn, rok og litur hafa torveldað þessi leitarstörf.

Haraldur Eiríksson leigutaki í Kjósinni er vandur að virðingu sinni þegar kemur að fyrsta laxinum og staðfestingu á að hann hafi sést. 

Í gær var Halli ásamt fleiri reynsluboltum að skyggna þessa hefðbundnu vorstaði í Kjósinni. Kvíslarfoss og þar fyrir neðan ásamt Laxfossi voru staðir sem rýnt var í en án árangurs.

„Þetta er að fara að gerast í dag, trúi ég,“ fullyrti hann í samtali við Sporðaköst í morgun.

Tveimur klukkutímum síðar kom svo SMS: „Kominn.“

Lax í gjúfrunum í Laxá í Kjós. Mynd úr safni. Ljósmynd/Laxá í Kjós

Seinna en síðustu ár

Þetta er frekar seint miðað við síðustu ár en oft hefur 23. maí verið dagurinn þar sem sá fyrsti er staðfestur. En eins og fyrr segir þá kunna aðstæður að spila inn í. 

Sporðaköst minnast þess hins vegar að Ásgeir Heiðar sem átti lögheimili í Kjósinni árum saman miðaði gjarnan við 27. maí og það á við í ár.

Myndbandið staðfestir að tveir tveggja ára laxar liggja utan í klöppinni beint út af hakinu í þúfunni í landinu okkar megin.

• Blogga um frétt

Seinustu hundraðkallar sumarsins