Matur | mbl | 8.3.2019 | 17:08

Kjúklingasalatið sem dæturnar elska

mbl.is/Berglind Hreiðarsdóttir

Það er alltaf vinsælt að vera með mat sem afkvæmunum hugnast enda fátt martraðarkenndara en vonbrigðagrátur barnanna þegar afrakstur eldamennskunnar er settur á kvöldverðarborðið.

Berglind Hreiðars á Gotterí & gersemar á blessunarlega ekki við þetta vandamál að stríða enda eru afkvæmi hennar afskapleg hrifin af hennar eldhúskúnstum. Hún segir að dætur sínar elski þetta salat sem alla jafna er kallað „japanska kjúklingasalatið“ á hennar heimili. Salatið hefur hún gert í mismunandi útfærslum en gott sé að hafa nóg af hnetum og fræjum í því.

Eitt það besta sem stelpurnar mínar fá er kjúklingasalat. Við höfum ótal sinnum gert „japanska kjúklingasalatið“ með núðlunum sem hefur verið birt í mismunandi útfærslum á hinum ýmsu miðlum. Sósan sem er hér á ferðinni er með svipuðu ívafi og það er alveg svakalega gott að hafa fullt af brakandi gómsætum hnetum og fræjum í svona salati.

Brakandi kjúklingasalat

1 pk. kjúklingalundir
100 ml sweet chili-sósa
3 msk. Til hamingju-sesamfræ
Ólífuolía til steikingar
Salt, pipar og hvítlauksduft

Steikið kjúklinginn í olíunni og kryddið til með salti, pipar og hvítlauksdufti.
Hellið sweet chili-sósunni út á þegar hann er tilbúinn og leyfið að malla í 2-3 mínútur og stráið sesamfræjunum yfir.
Færið kjúklinginn yfir á disk/leggið pönnuna til hliðar á meðan sósa og salat er útbúið.

Sósa

120 ml ólífuolía
50 ml balsamikedik
3 msk. púðursykur
2 msk. soya-sósa
2 msk. teryaki-sósa

Allt sett í pott, hitað að suðu og leyft að sjóða á meðalháum hita í 3-5 mínútur.
Hræra vel í allan tímann og taka af hellunni þegar byrjar að þykkna.
Leyfa að kólna aðeins í pottinum (hræra oft í á meðan svo hún skilji sig ekki).

Salat

100 g Til hamingju-kasjúhnetur
100 g Til hamingju-sólblómafræ
50 g Til hamingju-möndluflögur
1 poki klettasalat
3-4 lítil avókadó
Klasi af vínberjum
¼ brokkolihaus
½ rauðlaukur
Nokkrir kirsuberjatómatar

Ristið á þurri pönnu kasjúhnetur, sólblómafræ og möndluflögur þar til brúnast.

Skerið niður avókadó, vínber, brokkoli, lauk og tómata.

Skellið öllum hráefnunum saman í skál og setjið vel af sósu yfir og blandið saman (gott er að setja um helminginn af sósunni og hafa hinn til hliðar fyrir þá sem vilja meira).

Raðið að lokum kjúklingnum yfir salatið og berið fram.