Matur | mbl | 13.5.2019 | 11:01

Kornflex kjúklingur sem krakkarnir elska

mbl.is/Berglind Guðmundsdóttir

Ég er vandræðalega spennt fyir þessari uppskrift enda hljómar hún eins og eitthvað sem krakkarnir mínir munu elska. Þessi uppskrift verður prófuð á mínu heimili við fyrsta tækifæri enda elska börnin mín bæði kjúkling og Kornflex.

Uppskriftin kemur úr smiðju Berglindar Guðmunds á GRGS og eins og við vitum öll er hún flinkari en flestir að elda góðan mat þannig að við ættum að vera í öruggum höndum þar.

Kornflex kjúklingur sem krakkarnir elska

900 g kjúklingabringur, skornar í munnbita
125 g hveiti
140 g Kornflex, gróflega mulið
½ tsk. salt
½ tsk. svartur pipar
½ tsk. hvítlauksduft
¼ tsk. paprikukrydd
2 stór egg
60 ml mjólk
1 flaska hunangs bbq sósa frá Stonewall kitchen

Aðferð:

Setjið kjúklinginn í skál ásamt hveiti og blandið vel saman.
Í aðra skál setjið þið Kornflex, salt og pipar, hvítlauksduft og paprikukrydd. Geymið.
Látið egg og mjólk í aðra skál og þeytið saman.
Dýfið kjúklingabitunum í eggjablönduna og látið renna af þeim og veltið þá upp úr Kornflexi.
Setjið á bökunarplötu með smjörpappír. Setjið í 200°C heitan ofn og bakið í 15-20 mínútur.
Þegar kjúklingurinn er fulleldaður takið úr ofni og setjið í skál. Hitið bbq sósuna og hellið yfir bitana. Magn að eigin smekk.
Það er líka hægt að sleppa þessu stigi og hella sósunni í skál og bera hana fram með kjúklingnum.