Pasta með hráskinku og mozzarella

Ljósmynd/Guðrún Ýr Eðvaldsdóttir

Þessi pastaréttur er með eindæmum bragðgóður og einfaldur. Hráskinkan hefur þann eiginleika að gera allan mat betri og mozzaerella osturinn ætti að vera í öllum mat.

Hérna höfum við rétt sem er dæmi um það hvað góð hráefni eru mikilvæg. Ekkert flókið - öllu blandað saman í eitt fat og útkoman er dýrindis kvöldmatur eða réttur í saumklúbbinn eða á veisluborðið.

Pasta með hráskinku og mozzarella kúlum

  • 2 öskjur kokteiltómatar
  • 3 stk. hvítlauksrif
  • 1⁄2 tsk. chili flögur
  • 2 tsk. salt
  • handfylli ferskar kryddjurtir, t.d. timjan eða rósmarín
  • 500 g fusilli pasta
  • 100 g grænt pestó
  • 100 g spínat
  • salt og pipar
  • 180 g mozzarella perlur eða kúlur
  • 80 g hráskinka
  • handfylli fersk basilíka

Aðferð:

  1. Hitið ofn í 200°C.
  2. Setjið tómatana í eldfast mót ásamt ólífuolíu.
  3. Kremjið hvítlaukinn saman við og dreifið salti, chili flögum og kryddjurtum yfir.
  4. Hrærið öllu létt saman og bakið í ofni í 10-15 mín.
  5. Sjóðið pastað á sama tíma samkvæmt leiðbeiningum, þegar það er full soðið, sigtið vatnið frá og setjið pastað aftur í pottinn.
  6. Blandið pestó, spínati og helmingnum af mozzarella ostinum saman við pastað.
  7. Takið þá eldfasta mótið úr ofninum og blandið pastanu saman við tómatana í eldfasta mótinu.
  8. Sáldrið salti og pipar saman við eftir smekk.
  9. Þá er restinni af mozzarella ostinum dreift yfir ásamt hráskinkunni.
  10. Setjið aftur inn í ofn í u.þ.b. 10 mín.
  11. Skerið basilíkuna niður og dreifið yfir réttinn þegar hann kemur úr ofninum.

Höfundur: Guðrún Ýr Eðvaldsdóttir

Ljósmynd/Guðrún Ýr Eðvaldsdóttir
mbl.is