Magnús Björnsson tannlæknir lét sig ekki vanta á opnun sýningar Kristins Más Pálmasonar sem fram fór í Tveim hröfnum listhúsi. Klæðnaðurinn á Magnúsi var hressandi og töluvert öðruvísi en hjá hinum gestunum. Margir klæddust prima-loft úlpum sem njóta mikilla vinsælda, sérstaklega hjá fólki sem komið er yfir fertugt. Magnús var hinsvegar í appelsínugulum hyskisjakka við ljósar buxur og peysu með munstri. Jakkinn sem hann klæddist er frá Acne Studio sem er vinsælt skandinavískt tískumerki.
Hyskisjakkar eru augljóslega komnir aftur í móð en þeir nutu mikilla vinsælda í kringum 1990 og voru þá ýmist grænir eða svartir með skærappelsínugulu fóðri. Vinnufatabúðin seldi jakkana í bílförmum og voru þeir sérlega vinsælir hjá unglingum. Þeir pössuðu líka einstaklega vel við hermannaklossa eða skó með stáltá.
Nú eru breyttir tímar því hyskisjakkar fá nú að vera með í för þegar glæsileg myndlist er kynnt eins og gerðist á sýningu Kristins Más.