Íslenskt kvikmyndagerðarfólk og fleiri góðir gestir mættu á Bessastaði á fimmtudaginn þegar Guðni Th. Jóhannesson afhenti kvikmyndaleikstjórunum Miu Hansen-Løve og Joachim Trier heiðursverðlaun RIFF. Trier gerði opnunarmynd RIFF í ár en hún ber heitið Verdens verste menneske, Versta manneskja í heimi.
Fleiri erlendir gestir voru á Bessastöðum og ber þar helst að nefna söngkonu Blondie, stórstjörnuna Debbie Harry. Heimildarmyndin Blondie: Að lifa í Havana verður sýnd á hátíðinni og var leikstjórinn Rob Roth einnig mættur.
Þekkt íslenskt kvikmyndagerðarfólk og leikarar létu ekki verðlaunaafhendinguna á Bessastöðum fram hjá sér fara. Hjónin Gísli Örn Garðarsson og Nína Dögg Filippusdóttir voru mætt. Leikstjórinn Friðrik Þór Friðriksson fór líka út á Álftanes sem og þær Silja Hauksdóttir og Vera Sölvadóttir.
Þetta er í 18. sinn sem kvikmyndahátíðin er haldin og stendur hún til 10. október.Lokamynd RIFF verður Margrete, Queen of The North sem frumsýnd var í Kaupmannahöfn á dögunum í leikstjórn Charlotte Sieling og með Trine Dyrholm í aðalhlutverki. Norrænt samstarfsverkefni, True North er meðframleiðandi og Halldóra Geirharðs og Tinna Hrafns leika í myndinni.