Eliza Reid þá og nú – þvílík breyting

Forsetafrú Íslands, hin kanadíska Eliza Reid, hefur breyst mikið síðan hún varð forsetafrú. Hún er hætt að sjást opinberlega með gleraugu og komin með allt öðruvísi fatastíl. Hárgreiðslan hefur líka breyst töluvert en í dag er hárið töluvert síðara en vorið 2016 og klippingin allt öðruvísi. Heimildamaður Smartlands sagði á dögunum að frú Reid væri að líkjast Dorrit Mousaeff meira og meira, ekki bara í hárgreiðslu heldur líka í klæðaburði. Við seljum það þó ekki dýrara en við keyptum það og leyfum myndunum að tala sínu máli. 

Þegar myndasafn Morgunblaðsins og Smartlands er skoðað kemur margt forvitnilegt í ljós. Elsta myndin af frú Reid er úr Morgunblaðinu og birtist sumarið 2007.  

„Ætli megi ekki segja að ástin hafi togað mig til Íslands,“ segir Eliza Reid, sem er fædd og uppalin í Kanada, en fluttist til Íslands árið 2003 með manni sínum og sagnfræðingnum Guðna Th. Jóhannessyni. Í myndatexta kemur fram að frú Reid hafi unun af matreiðslu og hafi sérlega gaman af að grúska í matreiðslubókum og elda nýja rétti. 

Kvöldið sem Guðni Th. Jóhannesson sigraði í forsetakosningunum klæddist frú Reid kjól eftir Berglindi Ómarsdóttur klæðskera. Stuttu síðar sást hún oft í fötum úr smiðju Berglindar.