Smartland Mörtu Maríu | Tíska | mbl | 25.8.2013 | 13:00 | Uppfært 26.8.2013 14:46

Hljóp hálft maraþon í jakkafötum

Pétur Ívarsson hljóp hálft maraþon í jakkafötum. mbl.is/Árni Sæberg

„Þessi jakkafatahlaup hjá mér eru eiginlega bara afsökun fyrir því að hlaupa á lélegum tíma. Ég hef verið meiddur undanfarið og ekkert hlaupið i nokkrar vikur. Ég reyndi að fá einhvern í staðinn fyrir mig með þeim skilyrðum að viðkomandi mætti ekki hlaupa hraðar en 01:29:30. Ég vildi alls ekki fá skráðan á mig tíma sem ég ætti ekki. Það gekk ekki svo ég ákvað bara að hlaupa. Þar sem ég stefndi fyrr í sumar á undir 01:26:00 og engin innistæða fyrir því nú voru jakkaföt frábær afsökun og hljóp á 01:41:08. Þetta var mjög jafnt og flott skemmtilegt hlaup,“ segir Pétur Ívarsson, verslunarstjóri Boss-búðarinnar. Pétur var að sjálfsögðu í jakkafötum frá Hugo Boss enda klæðist hann ekki öðru ef hlaupaföt eru undanskilin. Þetta er því alls ekki í fyrsta skipti sem hann hleypur í jakkafötum.

„Ég hef svo hlaupið Gamlárshlaup ÍR nokkrum sinnu í jakkafötum þá er ég alltaf að koma úr svakalegum vinnumánuði þar sem ég hleyp ekkert og þá koma fötin aftur til hjálpar. Svo er önnur ástæða, hef nokkrum sinnum lent í því sjálfur að einhver gaur í búning sem blæs ekki tekur fram úr mér í heilu maraþoni og það er óþolandi. Svo hef ég lúmskt gaman af þessu. Reyndar hefur alltaf verið tekið fram úr mér í maraþoni ef tíminn hefur verið yfir 03:10:00 eftir það sleppur maður við helvítis búningagaurana.“

Veðrið í hlaupinu gær gerði Pétri örlítið erfitt fyrir því það rigndi á tímabili.

„Það var heldur erfiðara að hlaupa í jakkafötunum núna en í Gamlárshlaupinu þar sem það rigndi í upphafi og blaut jakkaföt eru ekki bestu hlaupaföt í heimi,“ segir hann.

Pétur byrjaði að hlaupa 2007 og hefur upplifað allskonar á hlaupaferlinum.

„Eins og allir miðaldra gaurar og gellur sem eru að vasast í þessu þá er maður alltaf meiddur annað slagið. Ég hljóp fyrsta maraþonið 2007. Eigum við ekki bara að segja að það sé upphafið þó ég hafi dútlað eitthvað áður. Í framhaldinu tók ég 4 maraþon og svo hljóp ég ekkert frá apríl 2009-janúar 2012 því ég var slæmur í bakinu á þessum tíma. Síðan hef ég hlaupið mjög skipulega.“

Pétur segir að fólk þurfi ekki að hafa neina hæfileika á íþróttasviðinu til að geta hlaupið.

„Ég hef sagt í gamansömum samanburði að þessi hlaupadella er svona „revenge of the nerds“ það er að til þess að vera alveg þokkalegur götuhlaupari top 10% hópnum þarftu vera góðan fókus á markmiðið og æfa skipulega. Flestir þessara hlaupara eru vel menntaðir og rosalega skipulagðir og voru aldrei aðalgaurarnir eða gellurnar í fótbolta eða handbolta í skóla. En í dag eru þetta flottustu gaurarnir og gellurnar þegar þeir hitta gömlu skóla félagana reunion-um skóla sinna og hafa afrekað eitthvað sem gömlu hetjurnar aðeins dreymir um.“