Ólafur Jóhannesson, þjálfari Vals, var nokkuð sáttur með stigið sem lið hans fékk eftir 1:1 jafntefli við Stjörnuna í toppslag í Pepsi-deild karla í knattspyrnu í kvöld. Sigur hefði komið Valsmönnum ansi nálægt titlinum, en hlutirnir eru í þeirra höndum með þriggja stiga forskot þegar fjórar umferðir eru eftir.
Auðvitað hefðum við viljað leikinn. Sigur hefði komið okkur í frábæra stöðu en jafntefli er ásættanlegt. Við erum í góðri stöðu,“ sagði Ólafur eftir leik og var sérstaklega ánægður með það að Valsmenn þurfa ekki að treysta á neina nema sjálfa sig.
„Það er það sem við viljum og fyrir mót sögðum við það að við vildum vera í baráttu að vinna mótið þegar lítið væri eftir og við erum það svo sannarlega,“ sagði Ólafur, en var ekkert sérstaklega sáttur við spilamennsku liðsins í kvöld þótt stigið hefði verið kærkomið.
„Mér fannst við ekki nógu góðir í þessum leik. Við eigum að geta gert betur og sérstaklega í fyrri hálfleik. Við tókum leikinn yfir þegar á leið, en jafntefli held ég að séu sanngjörn úrslit,“ sagði Ólafur.
Hann og Rúnar Páll Sigmundsson, þjálfari Stjörnunnar, stóðu lengi saman á vellinum eftir leik og ræddu saman. Hvað fór þeirra á milli?
„Við vorum nú aðallega að tala um það hvort við ættum ekki að fá okkur öl eftir leikinn. Það var eiginlega ákveðið að gera það!“ sagði Ólafur Jóhannesson, hinn hressasti.