Knattspyrnumaðurinn Harley Willard er að öllum líkindum á förum frá úrvalsdeildarliði Fylkis samkvæmt heimildum mbl.is. Willard kom til Fylkis frá Víkingi Ólafsvík í nóvember á síðasta ári en hann skoraði 11 mörk í 22 leikjum með Ólsurum í 1. deildinni á síðustu leiktíð.
Fylkir og Víkingur Ólafsvík eiga nú í viðræðum um leikmanninn sem var valinn í lið ársins í 1. deildinni á síðustu leiktíð af þjálfurum og fyrirliðum deildarinnar en hann skrifaði undir samning við Fylki til ársins 2021.
Fylkir hafnaði í áttunda sæti úrvalsdeildarinnar, Pepsi Max-deildarinnar, á síðustu leiktíð en Helgi Sigurðsson hætti með liðið eftir tímabilið og við tóku þeir Atli Sveinn Þórarinsson og Ólafur Stígsson með Ólaf Inga Skúlason sér til aðstoðar.