„Hefur staðið sig frábærlega í sumar“

Jón Þór Hauksson, landsliðsþjálfari kvenna í knattspyrnu, segist hafa verið gríðarlega ánægður með liðið þegar það kom saman á dögunum enda eru litlar breytingar á hópnum sem hann tilkynnti í dag. 

Frétt af mbl.is

Hópurinn klár fyrir stórleikinn í Svíþjóð - ein breyting

Ein breyting er á leikmannahópnum sem kemur til með að mæta Svíum ytra hinn 27. október í undankeppni EM. Rakel Hönnudóttir gaf ekki kost á sér af persónulegum ástæðum og Andrea Rán Hauksdóttir kemur inn í hópinn. 

„Andrea kemur inn í hópinn og hefur staðið sig frábærlega í sumar. Hún hefur stýrt spilinu eins og herforingi hjá Breiðabliki og staðið sig vel. Hún þekkir okkur og við þekkjum hana vegna þess að hún var með okkur í verkefnum í fyrra. Það er ánægjulegt að fá hana aftur inn og verðskuldað hjá henni,“ sagði Jón Þór þegar mbl.is tók púlsinn á honum í dag en Andrea var síðast með landsliðinu fyrri hluta árs í fyrra. Bæði í Algarve-bikarnum og í S-Kóreu. Hún hefur ekki ennþá leikið mótsleik með A-landsliðinu.  

„Staðan á hópnum er frábær. Leikmenn eru náttúrlega á miðju tímabili sem er virkilega gott eins og við sáum í síðustu leikjum. Þær eru allar í frábæru standi og spila vel með sínum liðum um þessar mundir.“

Eftir heldur fá verkefni á árinu fékk Jón Þór góð svör við ýmsum spurningum í leikjunum á dögunum. 

„Heldur betur. Bæði frá ungum leikmönnum en einnig frá hópnum í heild sinni. Við fengum frábæra svörum en höfðum rennt svolítið blint í sjóinn. Langt var á milli verkefna og þannig var það líka árið á undan. Í raun hefur þetta verið svolítið slitrótt síðan ég tók við liðinu og pásurnar á milli hafa verið langar. Sem gerir erfiðara að ná þeim takti sem við viljum sjá. Eftir síðasta verkefni erum við bjartsýn á að ná samfellu og við viljum auðvitað þróa og bæta okkar leik. Ég var gríðarlega ánægður með síðasta verkefni. Andinn var frábær og hugarfarið virkilega gott. Við stefnum á að halda áfram á þeim nótum,“ sagði Jón Þór Hauksson í samtali við mbl.is. 

• Blogga um frétt