„Þeir eru með einn stuðbolta með sér þarna í Ruth Þórðar sem veit út á hvað þetta gengur,“ sagði Helena Ólafsdóttir, umsjónarmaður Bestu markanna á Stöð 2 Sport, þegar rætt var um Aftureldingu í upphitunarþætti Dagmála fyrir Bestu deild kvenna í knattspyrnu sem hefst á þriðjudaginn.
Þær Helena, Bryndís Lára Hrafnkelsdóttir, fyrrverandi markvörður KA/Þórs og ÍBV meðal annars, og Harpa Þorsteinsdóttir, fyrrverandi landsliðskona, voru sérfræðingar þáttarins.
„Það er ekkert mál að vera lið í Reykjavík með enga stemningu en það er hugur í Mosfellingum með þetta lið, stemningin er mikil, og það mættu margir taka sér þetta til fyrirmyndar,“ sagði Helena meðal annars.