Lloris missir ökuréttindi - Ældi af áfengisdrykkju

Hugo Lloris, markvörður og fyrirliði heimsmeistara Frakka og Tottenham, hlaut í dag dóm fyrir að hafa ekið undir áhrifum áfengis miðsvæðis í London aðfaranótt föstudagsins 24. ágúst.

Samkvæmt frétt Evening Standard sást til Lloris aka Porche-bifreið sinni yfir götu á rauðu ljósi og fara nærri því að aka utan í kyrrstæða bíla áður en hann var stöðvaður af lögreglu. Þurfti lögreglan að hjálpa honum út úr bílnum og var hann valtur á fótunum, óskýr í tali auk þess sem æla var á gólfinu í bílnum. Áfengismagn í blóði hans mældist tvöfalt meira en leyfilegt er.

Lloris játaði sök fyrir rétti í London í dag og kvaðst hafa gert „hræðileg mistök“. Hann var dæmdur til að greiða 50.000 punda sekt, jafnvirði 7,4 milljóna króna, og missir ökuréttindi sín næstu 20 mánuðina.

• Blogga um frétt