Enski knattspyrnumaðurinn Alex Oxlade-Chamberlain ætlar að snúa aftur á knattspyrnuvöllinn á þessu tímabili en hann er í strangri endurhæfingu vegna alvarlegra meiðsla á hné sem hann varð fyrir í vor.
Oxlade-Chamberlain varð fyrir meiðslunum í leik Liverpool og Roma í Meistaradeild Evrópu í apríl á þessu ár og var talið að hann myndi ekkert taka þátt í leikjum Liverpool á þessari leiktíð. „Komandi keppnistímabil hjá Ox mun snúast um bata og endurhæfingu. En við höfum vitað þetta meira og minna frá því daginn eftir að hann meiddist," sagði Jürgen Klopp, knattspyrnustjóri Liverpool, í byrjun tímabilsins.
Miðjumaðurinn ætlar sér þó að snúa aftur áður en tímabilið er úti, í maí á næsta ári. „Ég vil spila nokkra leiki á þessu tímabili, þó ekki sé nema bara til að sanna fyrir sjálfum mér að ég geti það. Þá gæti ég átt gott undirbúningstímabil og byrjað ferskur haustið eftir það,“ sagði hann í myndbandi sem Liverpool gaf út þar sem erfið endurhæfing kappans er meðal annars sýnd.