Jack Butland, markvörður Stoke City, mun klæðast sérstakri grænni treyju í leiknum gegn Aston Villa á morgun til þess að heiðra minningu markvarðarins Gordon Banks sem lést í þessum mánuði, 81 árs að aldri.
Treyjan sem Butland klæðist er eins og sú sem Banks klæddist þegar hann varði mark liðsins í úrslitaleik deildabikarsins árið 1972, þar sem Stoke vann Chelsea og tryggði sér sinn fyrsta og stærsta titil í sögu félagsins. Treyjan er ekki með neinum merkjum á, engum auglýsingum og engu nafni á bakinu, öfugt við það sem venjan er á fótboltatreyjum í dag.
Fyrir leikinn á morgun verður jafnframt mínútu þögn til þess að heiðra minningu Banks og ættingjar hans verða á meðal áhorfenda auk liðsfélaga úr sigrinum eftirminnilega á Chelsea.
Banks lék á sínum tíma 73 landsleiki fyrir England og var lykilmaður í því að tryggja liðinu heimsmeistaratitil árið 1966, þann eina sem Englendingar hafa unnið. Hann lék með Stoke í sex ár frá árinu 1967.