Tilbúinn að lækka launakröfur sínar

Króatíski knattspyrnumaðurinn Mario Mandzukic hefur verið sterklega orðaður við enska úrvalsdeildarfélagið Manchester United að undanförnu. Mandzukic er samningsbundinn Juventus á Ítalíu en hann er úti í kuldanum hjá Maurizio Sarri, stjóra liðsins, og fær því lítið sem ekkert að spila.

Enskir fjölmiðlar greindu frá því í byrjun mánaðarins að króatíski framherjinn hefði gert munnlegt samkomulag við forráðamenn United um að ganga til liðs við félagið þegar janúarglugginn verður opnaður. Fjölmiðlar á Englandi greina nú frá því að Mandzukic sé nú tilbúinn að lækka launakröfur sínar umtalsvert.

Króatinn vildi í fyrstu fá í kringum 300.000 pund á viku í laun en hann er að þéna um 200.000 pund á viku hjá Juventus og er á meðal launahæstu leikmanna liðsins. Hann er hins vegar sagður tilbúinn að sætta sig við 150.000 pund á viku ef hann kemst til United í janúar en enska félagið þarf að borga 8 milljónir punda fyrir leikmanninn.

• Blogga um frétt