Watford hefur rekið Quique Sanchez Flores úr starfi knattspyrnustjóra eftir aðeins 85 daga í starfi en þetta var í annað sinn sem hann stýrði liðinu í ensku úrvalsdeildinni.
Watford hefur nú leit að þriðja stjóranum sínum á tímabilinu sem er ekki einu sinni hálfnað en Javi Gracia var látinn fara eftir aðeins fjóra leiki. Watford vann aðeins einn leik af tíu undir stjórn Sanchez Flores sem stýrði einnig liðinu árið 2016.
Watford er á botni deildarinnar með átta stig eftir 14 umferðir en liðið tapaði áttunda leiknum sínum í gær í botnslag gegn Southampton, 2:1.
Sem fyrr segir leitar Watford nú að þriðja knattspyrnustjóranum á þessu tímabili en þetta verða tíundu stjóraskipti félagsins frá því að Pozzo-fjölskyldan eignaðist félagið í júní 2012.