Duncan Ferguson, bráðabirgðastjóri Everton, segir að talsverð óvissa sé vegna meiðsla hjá sínu liði fyrir heimsóknina á Old Trafford á sunnudaginn en þar mæta Gylfi Þór Sigurðsson og félagar liði Manchester United í ensku úrvalsdeildinni.
Ferguson sagði á vef félagsins í dag að fimm leikmenn væru tæpir á þessari stundu. Seamus Coleman fyrirliði hefur verið frá í nokkrar vikur eftir að hafa fengið högg á rifbein en gæti spilað á sunnudaginn.
Vinstri bakvörðurinn Lucas Digne fór meiddur af velli undir lokin gegn Chelsea vegna nárameiðsla og Ferguson sagði að óvíst væri hvernig staðan yrði á honum á sunnudaginn.
Eins væru miðvörðurinn Yerri Mina, sóknarmaðurinn Theo Walcott og miðjumaðurinn Fabian Delph allir tæpir en Delph hefur ekki náð að spila undanfarnar sex vikur vegna tognunar.